علي احنا لازم نمشي من هنا في حد معانا في واحدة...
علي قالي واحدة مين يا امل انتي كويسة...
لا يا علي مش كويسة في واحدة حبستني في البلكونة و فتحت الراديو كانت بتمسح و عملتلك الفطار و...
علي سكتني و انا بكلمه و قالي طب والله عفريتة نشيطة و مريحاكي انتي مضايقة من وجودها ليه..
بصتله بنرفزة علي انت بتستظرف دة وقته و انا ببصله لمحت ب عيني وراه حد واقف عند أوضة النوم... دققت كويس لقيت واحدة واقفة بصالي بتركيز مقدرتش اتكلم و وقعت من طولي و انا بقوله هناك أهي...
فوقت و علي حاططني في السرير و دماغه و ألف سيف اروح أكشف و أني مش طبيعية و جبني هنا لحضرتك...
_تمام بصي يا أمل الي حصلك دة مجرد تهيؤات مش أكتر او خيالات خلقهالك عقلك الباطن بسبب الفرجة علي الافلام و انا متأكدة إن أغلب الاحداث دي و يمكن كلها أنتي الي نفذتيها يعني مثلا أنتي الي ظبطتي المنبه و نستيه و أنتي الي حطيتي القهوة و نسيتيها و انتي الي كتبتي بالروج و حضرتي الفطار و انتي الي كنتي بتمسحي البلكونة و نسيتي و انتي الي قفلتي ع نفسك كل دة انتي..
*قطعتني أمل و هي مش عايزة تصدق أنها موهومة و قالتلي
=طب و الست الي ظهرت ورا علي طب الموبايل الي فصل لما جيت اشغل عليه قرآن طب بلاش كله دة مين حط الفنجان في البلكونة يشرب قهوة انا اصلا مش بحب القهوة...
_سكت شوية و قولتلها أهدى يا امل كل دة انتي برضو مفيش حد معانا مفيش عالم موازي
=ازاي يا دكتورة انتي هتكفري و لا اية! هو اية الي مفيش عالم موازي دة مذكور في القرآن دة الثقلين
_انا مش هكفر يا أمل انا مقتنعة بوجوده و مؤمنه ب دة بس هما ميقدروش يحركو ساكن... بصي يا امل انتي الي عملتي كدة في نفسك و وصلتيها للدرجة دي من الوهم من أول ما غيرتي بيتك لمجرد الحمل و مشيتي ورا خوزعبلات ملهاش لازمه بدل ما تروحي تكشفي و تشوفي فين المشكلة و تتعالجي دة غير تاريخك المرضي أنك كنتي بتعاني من أوهام ما بعد الصدمة بعد وفاة والدتك كنتي بتوهمي نفسك أنها عايشة و بتتعاملي و تتكلمي معاها...
=يا دكتور انا ساعتها كنت عيلة صغيرة عندها عشر سنين محتاجة لأمها ف وهمت نفسي انها موجودة بس الموضوع خلص من زمان و لو انا غاوية اوهام متوهمتش ليه في شقتي القديمة اشمعنا الشقة دي.. هي من الاول مكنتش مريحاني بسبب رخص تمنها دة حتي كل الافلام الاجنبي بيجيبو فيها بيت بسعر قليل و يكون كبير و في الاخر يطلع داهية مليان عفاريت..
_شوفتي بقا انها اوهام و انك وصلتي نفسك للحالة دي بسبب الافلام.. عامة يا أمل انتي لازم تروحي ترتاحي و تاخدي الدوا الي كتبتهولك دة و انا متأكدة انك مش هتشوفي حاجة تاني..
*خرجت أمل من عندي و طلبت علي جوزها و قولتلوه انه لازم يركب في كل زاوية في الشقة كاميرا عشان نثبت ل أمل أنها هي الي بتعمل كل دة و قولتلوه يجبلي تفريغ الكاميرات بعد اول مرة امل تكلمه انها شافت حاجة مريبة"
مر أسبوع و لقيت أمل و علي جاين و معاهم موميري عليه تسجيلات الكاميرا الي حصلت خلال الأسبوع دة.. خدت الموميري و حطيته في اللاب قدامي و بدأت أتفرج
كانت أمل لوحدها في الشقة و داخلة أوضة النوم و بدأت تروق السرير و هي بتشد الغطا ظهر زي كتاب أو أجندة قديمة مسكتها أمل و قعدت ع السرير و فضلت تقرأ فيها و تقلب في الصفح بعدين أمل رفعت راسها و بصيت ناحية باب الأوضة بصت بتركيز مريب و ملامح أمل كان باين عليها الخوف و أنها شايفة حد بس كل زوايا الكاميرا جايبة الشقة فاضية و مفيش حد نهائي بعدين عين أمل بدأت تتحرك من علي الباب و كأنها بصة ع حد ماشي في الأوضة و فجأة شوفت كرسي التسريحة بيتشد لورا كأن حد بيقعد عليه و أمل بصة ع التسريحة و بدأت الحاجات الي ع التسريحة تتحرك و أمل بدأت ملامحها ترتاح و تبتسم أبتسامه خفيفة كأنها شايفة حاجة لطيفة أحنا مش شايفنها و بعدين رجعت أمل بصيت ناحية الباب بسرعة بخضة و فزع و بعد كدة عينها رجعت بصيت عند التسريحة و فجأة كل الي ع التسريحة وقع كأن في حد شاط كل الي ع التسريحة و كرسي التسريحة اتشال لوحده و أترمي ع الارض و أمل كانت مرعوبة شايفة حاجة ترعب أكيد.. باين ع ملامحها لقيت أمل رجعت لورا ع السرير و ضمت ركبها ع صدرها و هي بتعيط و فضلت كتير عينها مركزة ع العمود الي في الاوضة فضلت ع الحال دة فترة كبيرة لحد ما نامت او فقدت الوعي....
بعد حوالي نص ساعة من وقت الفيديو و انا بجري الشريط كل حاجة ثابتة لحد ما أمل فاقت تاني و قامت وقفت راحت ناحية المطبخ و خرجت شاكوش كبير و رجعت اوضة النوم و قعدت تكسر في العمود.. هي أمل بتعمل أية دي حالة أنهيار بسبب الاوهام و لا أية؟.. فضلت أمل تكسر كتير لحد ما فجأة شوفت هيكل عظمي وقع من الحيطة و قماش دايب جدا معاه و امل قعدت جنب الهيكل العظمي دة تبكي بشدة لحد ما علي جه من بارة و رفعها من ع الارض و حضنها.... قفلت الفيديو و قعدت دقيقتين مش فاهمة و مش مستوعبة اية الي كان في الفيديو دة... طلبت من الممرضة تدخلي أمل
دخلت أمل عليا و بصيت للغة جسمها لقيتها مطمنة و هادية أكتر من المرة الي فاتت علي الرغم إن حالتها في الفيديو مش طبيعية
_أحكيلي يا أمل أية الي حصل ؟
_ بعد ما روحنا فضلت الأصوات زي ما هي تلات أيام و الأغاني بتشتغل و كعب الجزمة.. علي الرغم أني كنت مواظبة علي العلاج و كنت بقول لنفسي دي أوهام و أقنعني ب دة حتي في مرة كنت بجهز الغدا و الملح وقع مني لقيته كتب جملة كدة و بعدين أختفت
_جملة أية؟
="نحن متشابهتان و نشترك في نفس القدر مع بعض الإختلاف ف أنتي أكثر حظ مني" و الجملة رجعت أختفت تاني و قولت دي برضو اوهام لحد ما كنت داخلة أوضة النوم أروق السرير و بشد الغطا ظهرت أجندة قديمة أوي علي السرير مكتوب عليها (1975) أستغربت جدا التاريخ و فتحتها لقيته لا خطي و لا خط علي بدأت أقرأ لقيتها مذكرات واحدة ست
كاتبة أنها بتحب جوزها جدا و كاتبة أن أول مرة قالها بحبك قدها شريط أم كلثوم أغنية "سنين و مرت زي الثواني في حبك انت" و كاتبة أن عيلتها كلها ماتت في الحرب و أن ملهاش حد في الدنيا لا أصحاب و لا قرايب غير جوزها و بعدين كانت كاتبة أن جوزها بيخونها و أنها مستحملة دة عشان بتحبه ف جريت شوية لحد نص الأجندة كانت كاتبة أن حلم عمرها أنها تخلف و أنها خايفة تموت وحيدة و بعدين فتحت أخر صفحة في الأجندة لقيت مكتوب فيها
١ فبراير ١٩٧٥
"النهاردة أنا رجعت من عند الحكيمة و بشرتني أني حامل شهرين أنا سعيدة أوي و شوكت أكيد هيطير من الفرح زيي لأنه هيصبح أب"
بعد كدة سمعت الراديو اتفتح بارة علي أغنية ام كلثوم "سنين و مرت زي الثواني في حبك انت" لمحت بطرف عيني حد واقف ع باب الاوضة بيبص عليا بصيت لقيتها واقفة بصة للأوضة و مبتسمة كانت واحدة جميلة و شيك أوي تحسي خارجة من فيلم قديم دخلت الأوضة و كل ديكورات الاوضة اتغيرت لمكان تاني و الفرش كله كان علي الطراز الكلاسيك القديم.. دخلت و هي طايرة من السعادة و كأنها مش شايفاني كانت لابسة فستان أحمر منفوش أكتر من رائع شدت كرسي التسريحة و قعدت عليه و خرجت الأجندة بس كانت لسه جديدة و كتبت أخر صفحة فيها و قفلت الاجندة و هي مبتسمة و بصيت لنفسها في المرايا و بدأت تحط برفيوم.. و فجأة ظهر راجل علي باب الأوضة و قالها أية كل السعادة دي يا نهال بصتله و هي مبتسمه و قالتلوه يمكن عشان هتكون أب يا شوكت.. لقيت الراجل دة ملامحه أتغيرت لغضب مش طبيعي و قالها أب أزاي و أنا كل الأطباء قالولي أني مش بخلف الي في بطنك دة أبن مين ؟.. لقيتها قامت وقفت و بتقوله تقصد أية يا شوكت أنا مش فاهمة حاجة.. و فجأة الراجل دة دخل الاوضة بغصب رهيب و حط راسها ع التسريحة و قرب من ودنها و قالها اقصد انك خااااينة و راح جر راسها ع التسريحة وقع كل الي عليها و بعدين رفع راسها و ضربها بالقلم ف وقعت ع الارض قدامه و فضل يضربها برجله في بطنها و هي بتصرخ من الوجع و بعدين شال كرسي التسريحة ورماه عليها و خرج المسدس و ضربها تلت طلقات في جسمها و بعدين جاب طوب احمر كتير و رصه عند الحيطه عمودين قصاد بعض و بعدين حط جثه نهال في النص و قفل عليها من قدام و قعد يصب ع الجثة و هي جوا الطوب أسمنت و جبس و بعدين قفل ع الجثة من فوق...
و فجأة لقيت كل حاجة في الاوضة رجعت زي الأول و العمود اللي في الاوضة كان قدامي متبيض مش طوب احمر ف اغمي عليا و لما فوقت قومت أكسره عشان اتأكد انه مش حلم و للأسف مكنش حلم ...
_ لا يا أمل مكنش حلم بس انتو لازم تبلغو دي جريمة قتل
= علي بلغ و النيابة جت حققت و بواب العمارة أعترف أن فعلا صاحب الشقة دي الأستاذ شوكت انتحر بعد أسبوع من أختفاء مراته في ظروف غامضة و في الليلة الي انتحر فيها كان راجع من بارة عمال يكلم نفسه و يقول يعني انا كنت هكون أب يعني أنا طلعت بخلف... و بليل أنتحر و الشقة خدها الورثة من قرايبه بس محدش كان بيتحمل يقعد في الشقة أكتر من أسبوع و كان كله بيقول بيسمعو أصوات و أغنية ام كلثوم بتتفتح في نفس التوقيت كل يوم ف محدش كان بيستحمل و يطفش منها...
_ياااه يا أمل دة و لا الخيال لولا أني شوفت تسجيلات الكاميرا كنت حولتك السرايا الصفرا
= و لا أنا كنت هصدق غير لما شوفت ب نفسي
_طب انا مفهمتش أنتو قدركم تشابهه في أية يا أمل
=في ان احنا الاتنين قعدنا اربع سنين من غير اطفال بس امبارح اكتشفت أني حامل شهر ونص
امل لسه في نفس البيت مسبتهوش و الاصوات كلها أختفت منه و الحياة بقت فيه طبيعية و معاها دلوقتي آدام و حياتها طبيعية جدا العالم الموازي موجود و الي ساكنين فيه حوالينا في كل مكان بس انت متكابرش و صدق في وجودهم... تخيل لو قدرك متشابهه مع قدر حد مات من ألاف السنين او حتي عشرات السنين تخيل أنك بتمشي كل خطواته و بتعيش نفس لحظاته و بتحب الحاحات الي بيحبها و بتكرهه الي بيكرهوه.. ها مش ممكن؟!
.