ما قاله الجان عن البشر

اعتقد ان كل حكاوينا عن العفاريت والجن مسلية، وربما مخيفة لبعض الأشخاص، وربما مجال خصب لبعض المؤلفين خاصة انه هيقول عن العفريت زي ما يحب، ومحدش هيحاسبه، ولا فيه محكمة هتحكم عليه بتهمة الاساءة لعالم الجن، ولا الجن فاضي انه يدور على مؤلف قصة رعب عشان يعاقبه او يعاتبه على اللي بيقوله.. 

طيب تعرف ان عالم الجن عنده حكماء، الحكماء دول هما طائفة من صفوة المجتمع زي الادباء عندنا كدا، بل ولهم بعض البرديات النادرة جدا واللي أكد بعض الفلاسفة انها من كتابات الحكماء.. 

في فصل جميل في كتاب علوم الجان اسمه "ما قاله الجان عن البشر" 

الفصل ده مذكور فيه تراجم لبعض المخطوطات السحرية والبرديات القديمة اللي اتقال انها من اقاويل الجان.. 

"البشر خلقوا كي نسطو على عالمهم" 

ابن ابليس الأصغر

"علموهم السحر فهو البوابة التي تمكنا من رقابهم" 

إبليس

"الجنس هو المفتاح الاعظم الذي يمكنك من ان تملك ذكور البشر" 

الشيطانة ليليث

والحقيقة كل ده منقول نقلا من كتاب المرسال القديم واللي كاتبه مجهول حتى اليوم، بس فيه بردية خاصة اتذكرت على لسان بطليموش زعيم قبائل الجان الاحمر وهي خلت جسمي يقشعر شويتين.. 

البردية بتقول "سيذكرونكم كثيرا من باب المرح، فكونوا لهم بالمرصاد، كل من يذكركم اذكروه، وكل من يكتب عنكم افتحوا له من العلوم حتى يتعلم السحر، فإذا تعلم السحر تمكنا منه، وإذا تمكنا منه جعلناه من الأشقياء" 

رغم انها مجرد خرافات ربما بس كلامه مقبول نوعا ما، انا بدايتي كانت مجرد كتابة قصص رعب، مكنتش متوقع ان كل العلوم دي تتفتح ليا بكل البساطة دي، حتى بعض الكتب اللي كان مسماها مفزع بالنسبة ليا بقيت بتصفحها وكأني بقرأ في كتاب التاريخ مثلا.. 

وفي الفصل ده تم الاستشهاد بالموراني، والموراني ده كان من فلاسفة حضارة بابل القديمة واول من تحدث عنه الناس في مجال كتابة الحكايات المخيفة، يقال ان امرأة جميلة قابلت الموراني تحت شجرة وعرضت عليه نفسها، وبالفعل من شدة جمال المرأة لم يتمالك الرجل نفسه، وبعدها اهدته كتابا له ملمس غريب، ملمس يشبه ملمس جلود الماعز الجبلية.. 

ويقال ان هو ده كتاب المرسال اللي سقط في يد الموراني، وكان الكتاب عبارة عن فجوة من الجحيم فتحت على أهل بابل، وقدر الموراني يتواصل مع الشيطان نفسه ببعض الطلاسم اللي بتجلب ابليس نفسه واللي مش موجودة في اي كتاب سحر على وجه الأرض غير في كتاب المرسال القديم.. 

وبعد استحضار الشيطان اللي اوهم الموراني انه سيده وانه هيطيعه في جلب كل ما يريده، والحقيقة ان الشيطان كان بدأ يستخدم الموراني كوسيلة لوصول علوم السحر لسبعة من أهل بابل منهم طالور ناي ودي امرأة من أجمل اهل الأرض وذكر اسمها في كتب عدة على مر العصور بأنها أشهر ساحرة على مر التاريخ.. 

وخرج السحر بمسمياته للأرض، الابيض والاسود والسفلي، وبعدهم سحر الكابالا اللي مشتق من السحر الاسود ولكن يختلف عنه في بعض الاشياء.. 

والحقيقة ان التفرقات دي لا تفرق مع الشيطان في أدنى شيء، خاصة ان السحر مصدره واحد، هو شر وطالما موجود فالشيطان نشط وعنده قوة، حتى امور الروحانيات والدجل والابراج بعضها به من السحر.. 

ورجع تاني الفصل يتحدث عن وسيلة جذب الشياطين، وهي الحكي الكاذب او الصادق عنهم.. وده بيلفت نظر صغار الشياطين للشخص ده، نفس فكرة الفضول عن صغار البشر، بس الاسوأ بقا في صغار الشياطين عن كبارهم انهم معندهمش القدرة الكاملة على الاختفاء السريع او الرحيل في الوقت المناسب..

يعني ببساطة ممكن حد من صغار الجن يظهر لمؤلف قصص رعب، ومع بطئ اختفاء الجني الكاتب او الشخص ده هيقدر يشوفه بتفاصيله، وده شيء مدمر ومحطم للنفس البشرية مع بشاعة المنظر اللي هيشوفوا الشخص ده..

واتذكر في الأثر ساحر أفريقي اسمه بوالا ان قبل ممارسة السحر كان بيقص حكاوي للأطفال الصغار عن الارواح الشريرة والشياطين في الليل، وفي ليلة وهو يتجول وسط الاحراش خرج له طفل صغير وطلب منه يحكيله حكاية..

ولما انتهى الرجل من حكايته للطفل قال الطفل "لم تروقني حكايتك واملك حكاية اكثر منها رعبا"

وفجأة تحول الطفل لشيء دميم بوجه متفحم وعينان سوداء بارزة..

الساحر وقتها طلب الرحمة من الطفل اللي طلب منه يحضر له كل ليلة والا هيكون الموت جزائه، وبالفعل ويوميا كان بيزور بوالا الطفل يوميا حتى تعلم منه السحر وأصبح من اشهر سحرة القبيلة..

تفتكروا انا ككاتب رعب ممكن اتعرض لموقف من دول في يوم من الايام، او ممكن فعلا اكون اتعرضت لده وكتاباتي الجديدة دي ما هي الا تمهيد لتقديمكم كقرابين للشيطان نفسه..

ربما..

كل شيء متاح، خاصة مع كل الحكاوي الغريبة اللي مريت بيها بداية من الاسقاط النجمي مرورا بالاعيب العين الثالثة واخرها وقوع بعض الكتب العجيبة في يدي..

اللي انا عاوز اقوله في نهاية الفصل البسيط ده، اكتب رعب براحتك بس مش بشكل مستمر.. لانك بتلفت نظر صغار الشيطان بالطريقة دي..

لسة بنمهد لشيء مخيف جدا انا لسة مقربتش منه، ومعرفش انا هكمل حكي للنهاية ولا لا، دعمك فارق جدا معايا بلايك وتعليق وشير، ولو عندك معلومة او سؤال او موضوع متعلق في ذهنك تقدر تكتبلي عنه في التعليقات وانا لو عندي فرصة هتكلم عنه..

بقلم ✍️أحمد محمود شرقاوي