يا بنتي ايوه هو ..ظهرلي وحذرني من انك تتجوزي خالد والا..
والا ايه يا ماما
والا هيقتله هو كمان ..الحقيقه كدا كتير اوي مش كل شاب هيتقدملك يا حبة عيني هيتقتل ..ف قررت اتصل بيهم ائجل الموعد لتاني يوم وانتي مش موجوده ..ولما يجو أبين لهم اننا ناس قليلي الذوق و اطردهم ف ميقربولناش تاااني ..ودا الي عملته
ومحكتيليش ليه ياماما طول الفترة دي؟
علشان الشيخ قاسم ظهر اليوم دا وحذرني اني اتصرف اي تصرف خاطئ واسيب كل الامور علي مجراها ومحكي لكيش حاجه ابدا لحد مهو ينهي الموضوع فسمعت الكلام ..طبعا اكدلي ان الحكي ممنوش فايدة لانك مش بتفتكري حاجه بعدها
والحل دلوقتي ايه؟ انا الجن بيظهرلي في هيئة خالد و مديني مهلة والا هموت انا وكل الي بحبهم ؟ هعمل ايه ؟ الشيخ قاسم هيتصرف ؟ هيساعدني؟
مش عارفة يا بنتي انا مش متاكده من حاجه غير انها هتتدبر ان شاء الله.. متقلقيش
دا رايك يا امي؟
ايوه يابنتي ان شاء الله ربنا هيدبرها
منمتش طول الليل يا مازن وفضلت قاعده مستنية لحد الفجر ودخلنا فى اليوم التالت من المهلة ..
عيني غفلت فالوقت الي بعد الفجر علي طول ..ما قبل الشروق حلمت اني واقفه في مكان محستش انه غريب ابدا عليا بس هو مكان يخوف جدا ..عباره عن بيت تقريبا بس ..الحيطان كلها لونها احمر الارض لونها لون الحمم البركانية … صوت أمواج جاي من مكان بره البيت ..مفيش شبابيك شايفه منها ايه الي بره بس انا واثقه ان فيه بحر ..في كل ركن من اركان الغرفة الي انا واقفه فيها في تحف مصنوعه من الدهب ..الي علي شكل ملاك والي علي شكل ست شعرها طويل والي علي شكل ثعبان كوبرا كبير و الي على شكل نافورة و في وسطها طفلين صغيرين ولد وبنت..ماسكين ف ايد بعض ..كان الجو مألوف ومش مؤذي ابدا بالنسبالي مع انه مرعب..مشيت كأني عارفه البيت ومتربية فيه ..وصلت للباب و فتحته وخرجت ..فعلا لقيت بحر ادامي وامواجه هايجة جدا ..بس لونه اسود ..مش مستغربه ابدا ..الرملة لونها احمر لون الدم وفي بعيد واحد واقف مديني ضهره وبيبص للبحر..كان شاب ماسك في ايده عصايه طويله واضح انها ثمينة مصنوعة من معادن باهظة و ف طرفها من فوق راس ثعبان كوبرا كان ..لابس لبس حلو جدا ..لبس شبه الملوك الي بنشوفهم في المسلسلات التاريخية ..بالطو حرير منقوش عليه زخارف يبدو انها فاخرة جدا وهو شعره اسود فاحم جدا وطويل ..
لقيت نفسي بقول …
السلام عليكم يا أزراش
ولكي السلام يا أينور
بقالك كتير مستنيني
مش كتير اوي ..20 سنة
دا كتير عندنا
عارف
وقام اتلفت علشان يبصلي
لقيت عنيه شكلها مرعب ..لون عنين القطط ..لونها اصفر ..او لو عايز وصف ادق..علشان ميحصلش التباس ..هي مش عنين قطط دي عنين ثعبان كوبرا .. وكان شكل وشه عادي جدا شبه وش الانسان ..عنيه بس الي كانت مرعبه..انا مخفتش خالص من شكل عنيه ..انا مش متحكمه في نفسي خالص.دا حلم ..بس من اغرب الاحلام الي ممكن تتصورها .. ابتسملي وقالي
تعالي اقعدي
حاضر
انا اسف علي الي عملته ؟ مكنش دا هدفي ابدا اني اسببلك كل الاذى دا بس انا وقتي ضيق ومحكوم عليا بالإعدام ومغضوب عليا من أهلي وعشيرتي .. كنت ملعون حتى مقدرش اقربلك من ساعت مسلمتك لوالدتك حاولت اعمل كل حاجه ..وفشلت ..ارتكبت كل الاثام والجرائم ..بس اهلي عملو كل حاجه حرفيا يقدرو عليها لمنعي ..لان حب أنسية محرم علينا وعقابه الموت ..انا امي توسلت ل ابي علشان يخفف الحكم ..ف اصبح اللعن و الحد من قدراتي هو عقابي..بس انا حاولت استعين بكل الكتب و انفذ كل العلوم ...استعنت باكبر السحرة الهاربين من عالمنا وتواصلت مع كبار السحرة في عالمك ..علشان اوصلك وكان الحل اني اقدم 3 قرابين علشان اقدر اتشكل واظهر لك في جسد أنسي علشان نقدر نتجوز ..لكن فشلت بعد قتل الأنسي التاني الي اتقدملك ..كان زميلك فالكلية ..بس اهلي اكتشفو جرائمي ..قتل أنسي عقابه الموت ..لكن امي توسلت لابي للمرة الثانية .و والقو عليا لعنات اكبر.واتحبست مكنتش اقدر اشوفك حتي الا لو دخلتي الحمام . في المكان الي بتاخدي فيه دروس العزف علي الكمان . لحد اليوم الي جه خالد فيه وكسر جزء من اللعنة بالصدفه لما كان رايح كنت صنعت سحر مربوط ب ظاهرة فلكية ورسمت دائرة وكنت محتاج انسان يدخل فيها بس ..يكون ذكر..و بكدا اكون قدمت القربان الاول فى الزمن دا و الثالث بعد الاتنين الي قدمتهم قبل كدا ..امور معقدة جدا مش من المستحب تعرفيها ..وكل حاجه كانت ماشيه كويس ...كان المفروض بس اتلبسه لبعض الوقت وبعد كدا ينتحر وبكدا اكون قدمت القربان دا و اتجسد في شكله لكن المشكله ان خالد حبك و راح اتقدم لك والدتك وافقت حاولت احذرها..سمعت الكلام فالاول ..لكنها تواصلت مع الشيخ قاسم و وقعوني في فخ ..وقدمني للمحاكمه ودي اخر فرصه ليا انا محكوم عليا بالموت ..انتهت كل الفرص حتى توسلات امي مببقاش ليها فايدة ..خلاص انا هارب دلوقتي و لو حارس واحد شافني هيتم القبض عليا وتسليمي للموت ..
كل دا عملته علشان توصلي؟
اه
بس انا ليه مش بفتكر حاجه لما بصحي
علشان دا جزء من اللعنة الواقعة عليا انك تنسيني وتنسي اي حدث انا بتسبب فيه ..انا هلقي عزائم محرمة عشان تفتكري الحلم دا..
طيب انت كنت بتهددني ليه اني هموت انا والي بحبهم
لان هلاكك مربوط بهلاكي ..انا اسف
ازاي
مصيرك اتربط بمصيري من ساعت مقابلتك وانتي عندك خمس سنين يوم ما اخدتك من والدتك في مقابل انها ترجع المخطوطة ..
ماما حكيتلي ..انت الي خدتني؟ تحت الارض؟ خطفتني؟
الي عمله والدك مكنش مقبول ..انا كنت صغير جدا فالسن ..مكلف بحماية المخطوطة كنوع من التدريب ليا وبعد كدا اخد مهمة اكبر واثبت نفسي ..وهكذا علشان لما اكبر ابقي مؤهل لحكم المملكة..انا ولي العهد الابن ..الوحيد الذكر ..وكان بيتم تدريبي وتأهيلي علشان تقلد الحكم لما اوصل للسن المناسب ..وفشلت ف اول مهمه ليا ..تم حجزي وسرق المخطوطه الي فيها جزء من اسرار عالمنا ..وسرق ذهب وكنوز خاصه بينا ..كان لازم اعمل حاجه ..كان من المفترض انتقم من والدك ونسله اجمعين ..بس انتي كنتي طفلة بريئه وجميلة ..شفت لمحة عن المستقبل..شفتك زوجة ليه ..عشقت صورتك الي في مخيلتي وانتي شابة جميلة لما اخدتك ..جينا هنا ..المكان دا كنت بهرب ليه دايما ..وقررت يبقي بيتنا ....بس امي لما عرفت بالي حصل طلبت مني ارجعك لوالدتك ومأذيكيش احنا لانؤذي الاطفال انس او جان ..وعملت كدا ..بس بيني وبين نفسي قررت انك مش هتبقي لحد غيري لا أنسي ولا جني وانا الي هتجوزك ..حتي لو دا محرم حتي لو عاديت كل أهل الارض ..ما فوقها وما تحتها ..والقيت عزيمة تسمي عزيمة ربط المصير..اذا مت فأنت تموتين ..وعلشان كدا بستعجلك نتجوزونتحد و نندمج ونهرب الي عالم بعيد ..لو تم القبض عليا واتعدمت انتي كمان هتموتي ..انا بحاول اوصلك الرسالة دي بس معرفتش اوصلها لك بشكل مباشر لان مليش سلطة وقدرتي محدودة ..انتي موافقة تتجوزيني؟
ملحقتش ارد لقيت البحر انقسم من النص وظهر شاب واقف وف ايده ورقه صفرا قديمه بيقرا منها ..وامي واقفه جمبه
لقيت أزراش انتفض من مكانه وقال
قاسم؟
مبقتش عارفه الحلم من الحقيقة ...كل حاجه اتلخبطت ..مبقتش عارفه انا صاحية ولا نايمة ..الدنيا بر جدا جدا جدا جدا جدا..بترعش من البرد والخوف ..أزارش قرب مني ومسك ايدي و خبط الارض ب العصاية اللي معاه وقاله
لا استطيع تركها ايها القاسم فهي لي والا ستهلك
ودارت اشنع معركة ممكن تتخيلها يا مازن