ابويا هو وزمايله عملو ايه يا ماما ؟
بصي يا بنتي فالوقت دا كانت منتشرة حكاية ان الناس تحفر وتلاقي اثار وناس كتير لقت اثار واتغنت وناس اتبهدلت وحصلهم كوارث … وابوكي عمل كدا هو وزمايله حفرو تحت بيت واحد منهم وبالفعل لقو صندوق فيه عملات اثرية ودهب وباعوه ودا الي حصل ..بس احنا من الناس الي مشافوش خير ..وابوكي حكالي ان محدش يقدر يحفر بالسهولة دي لان الاثار المدفونة دي بيبقي عليها حراس من الجن و الاغلبية بيحتاجو معاونة ساحر او حد واصل علشان يتخلص لهم من الجن الحارس دا بس ..وكان الشخص الواصل دا هو الشيخ قاسم وكان مفهم ابوكي وزمايله انهم كدا خلاص اتخلصوا من الجن و يقدرو ياخدو كنزهم ويبيعوه ..ودا الي تم لحد ما ..
ما ايه ياماما
لحد يبنتي ما لقوهم كلهم ميتين موتة بشعة ..كل واحد في بيته الي محروق والي رقبته مكسوره والي مدبوح و الي مشنوق هم كانو 4 وابوكي الخامس كلهم كانوا عزاب ابوكي هو الوحيد الي كان متجوز وليه اسرة وعلشان كده هو كان اخر واحد يتعاقب هو ونسله الجن.. يبنتي مسبهوش لما اتشال و اتهبد كدا جاله كسور ونزيف داخلي وكانت حالته خطيرة لما وصلناه للمستشفي الي جمبنا الي كانت امكانياتها متوسطه كان بيحاول يحكيلي الكلام دا بالعافيه وهم بيسعفوه
وبعدين
وصفلي عنوان الشيخ قاسم وروحتله .. العنوان الي وصفولي كان سهل ومش بعيد ف روحت...وصلت عند البيت ..بيت انيق جدا اشبه بالفيلا ... خبطت لقيت في انتظاري شاب حوالي 35 سنه شعره اسود فاحم وعنيه تخوف مش عارفه ليه بس فيها لمعان غريب ..لكن فالحقيقه هو كان وسيم يعني شكله مش دجال او لابس جلابيه ولا ماسك سبحه ولا ادامه بخور بالعكس دا لابس بدله و شاورلي اقعد..قعدت ..لسه هنطق شاورلي اسكت ولقيت داخل علينا واحد يبدو انه من اعوانه.. وجري عليه وسجد له … ومسك ايده وباسها وقاله سيدي القاسم اشكرك علي معاونتك لي فأنا طوع أمرك من الان فلتامر ما تشاء..شاورله روح امشي دلوقتي و تعالي بعدين ...سالته
حضرتك الشيخ قاسم
ايوا
انا..
انا عارف انتي مين وجاية عايزة ايه ..بنتك مش هنقدر ننقذها بسهوله الا لو ادينالهم المخطوطة
وهي فين دي يا شيخ
فالصندوق الي فيه الذهب هتلاقيها مخفية في احد الجيوب
وفين الشنطة انا معرفش حاجه ..زمايله كلهم اتوفو وهو في المستشفى بين ايد ربنا ..وبنتي يا شيخ طفلة صغيرة ملهاش ذنب
انا هساعدك بس علي شرط
ايه هو
تنفذي كل الي هقولك عليه
حاضر اي حاجه هتقولها هنفذها
قابليني بكرة الساعه 9 بليل في المقابر المتطرفة الي علي اول الطريق
وانا هستني للساعه 9 بكرة واسيب بنتي
متقلقيش زمانهم غير زماننا ..الوقت دا بالنسبالهم دقايق معدودة..تعالي الساعه 9 وهتاخدي بنتك
حاضر
وعبال مروحت يبنتي لقيت ابوكي توفاه الله ..معرفتش احزن ولا افرح بسبب الي عمله ..د جوزي ابو بنتي ..وبنتي فين ؟ خطفها جان !!
فضلت ابكي بحرقه والناس يهدوني ..اليوم مر بصعوبه جدا مابين الدفنة والناس الي جت تعزيني من الجيران ..احنا يابنتي مكنش لينا حد لا انا ولا ابوكي ..كنا مقطوعين من شجرة لا لينا أهل لا اخوات ولا اب ولا ام كنا مكتفين ببعض وخلاص والحمد لله كان ربنا كرمنا بيكي .... المهم جت الساعه 9 وروحت للشيخ قاسم في المقابر الي قالي عليها
لقيته واقف قدام القبر وفي ايده صندوق
بص وراه تقريبا عرف ااني وصلت ..مبقتش افكر عرف ازاي ولا بصلي ليه كل الي في دماغي بس اني اخدك ف حضني تاني
لقيته شاورلي بمعنى تعالي
روحت لقيته حط الصندوق قدام القبر وفتحه وطلع مطواة صغيره من جيبه و حفر بها في الصندوق وطلع حاجه من جوه زي ورقه كدا قديمه اوي وصفرة وحطها قدام القبر ..وطلع ازازة صغيرة من جيبه و فضاها فالارض قدام الصندوق..كان فيها سائل احمر ولقيته قال كلام يابنتي مفهمتوش ..كلام بلغة غير مفهومة مش عربية اصلا او عربية وانا مش فهماها او عربية معكوسة مش عارفه
"اهيا شراهيا دهموتا عال متعال في علوه اين اجناد القوية اين الشمهامرية اين كردن اين دردم اين عصاب اين صاحب حبل الدخان اين الراكب على فيل المتعمم بالثعبان اجيبوا واحضروا بحق الاسماء العبرانية وبرهموتا وشيموثا اجيبني… ثم خذ ما اردت "
بعدها الجن يبنتي ظهر بنفس شكله..خرج من القبر وخد الصندوق والورقه منه .. واتكلم بصوت فحيح الثعابين دا ومفهمتش منه حاجه ..فالشيخ قاسم قالي قوليله قبلت
قلتله اقوله قبلت علي ايه
قالي مش وقت استفسار دلوقتي انتي مش وافقتي علي انك تنفذي اي حاجه عشان تنقذي بنتك ...قولي قبلت
فقولت
قبلت قبلت قبلت
الجن بصلي وابتسم واختفي
قلت للشيخ قاسم
ايه الي هيحصل دلوقتي
هتروحي البيت تنامي تصحي تلاقي بنتك جمبك
بس كدا؟
بس كدا
وايه الي انا قبلته؟
انك متمسيش لا انتي ولا بنتك اي من كنوزهم مره اخري ..
حاضر انا فعلا مش هلمس اي حاجه تاني وهاخد بنتي وامشي من هنا
كويس دا الي كنت هطلبه منه اصلا..بس
بس ايه يا شيخ
هتحتاجيني بعد كام سنه ...مش هتلاقيني هنا خالص ..متقلقيش ساعتها ..انا هجيلك
هحتاجك ليه يا شيخ قاسم ؟ ليه هحتاجك ؟ رد عليا ……...
واختفي يابنتي
مفكرتش جريت عالبيت علي طول واستنيتك..وفعلا عيني غفلت معرفش ازاي واول ماصحيت لقيتك قاعدة بتلعبي في اوضتك ولا كأن في حاجه معرفش شوفتي ايه و لا واجهتي ايه ولاكنتي فين الفتره دي ..كنتي طفلة صغيره ..هسالك ايه ؟
كان تاريخ اليوم دا 5/1/2000 ...وجينا هنا علي اسكندرية وعشنا سنين .. بس كل سنة ف نفس التاريخ تحصل حاجات مريبة ..مرة ابواب البيت تتفتح وتتقفل لوحدها ..مرة اسمع صوت فحيح ..زي صوت الجن الي سمعته قبل كدا..كنتي بتكبري سنة بعد سنة ..يا حبيبتي بس في حاجه بتحصل معاكي مكنتش عارفه امنعها ..كنت ادخل عليكي الاوضه الاقيكي اعده عالسرير و مبرقه كدا لوحدك ..او واقفه تبصي فالمراية الساعه 3 الفجر وعماله تضحكي..ولما اجي اسالك الصبح عن الي حصل دا مكنتيش بتبقي فاكرة خالص
ولكن كان افظع حاجه حصلت معانا لما خلصتي ثانوية عامة..واتقدملك واحد من جيرانا ...محمود الله يرحمه
هو محمود اتقدملي يا ماما ؟ انا مش فاكرة خالص
اه يبنتي انا عارفه انك مش فاكرة
حصل ايه يا ماما لما اتقدملي؟
حالتك اتدهورت جدا جدا جدا بقيتي تصحي من النوووم تصرخي بلا سبب..تبقي قاعدة معايا بتكلميني الاقي عنيكي قلبت ..بقت شبه عنين الجن ..لونها اصفر وفجاه تقعي فالارض وتتنفضي جامد وتتشنجي ..وديتك لدكاترة رغم اني عارفه ان في حاجه اكبر من كدا ..خدتي ادويه كتير كانت بتنيمك بس لما كنتي تصحي ..عينك متشوف الا النور..صريخ وزعيق ..حتي كنتي بتتهجمي عليا وعايزة تموتيني ..كان في ايام كنا بنضطر نربطك فالسرير الحقيقه ..محمود وقف جمبنا ياما بس اتفاجئنا بخبر وفاته في حادث علي الطريق الصحراوي ..وبعدها الامور هدت تماما ..قلت الاعمار بيد الله وارد يحصل لاي حد كان شاب خلوق ومحترم و اصيل بس ميعظمش علي الي خلقه
وبعدين؟
مرت كذا سنة وانتي في الكلية اتقدملك شاب زميلك ..
مين دا؟
مانتي مش فاكراه برده يا بنتي هيفيد ب ايه مين
وحصل ايه ساعتها؟
نفس الي حصل المره الي قبلها بس علي افظع ..في مره من المرات ..فتحت عليكي باب الاوضه كنتي ماشيه علي الحيطة صرخت واستعذت بالله من الشيطان الرجيم ..كنتي كل مره تعملي حاجه يعجز العقل عن تفسيرها وتنتهي ب انك تتشنجي وتقعي فالارض ..وانا كمان عجزت عن علاجك ..زميلك دا برده كان شاب محترم واصيل ومسابكيش لحظة ..بس
بس ايه يا ماما؟
غاب يبنتي علينا اسبوع مبيكلمناش قلت دا طفش..بس قلبي كان واكلني عليه ف اتصلت بيهم
وبعدين يا ماما ؟ اتصلتي لقيتي ايه
اخته ردت عليا قالتلي انهم فتحو عليه باب اوضته لقوه شانق نفسه وامه يعيني من الحزن جالها سكته قلبيه وهي فالمستشفي جريت علي جارتنا سهام وحكيتلها كل حاجه يبنتي ..وديتني لشيوخ كتير محدش عرف يعالجك ابدا ..استنيت الشيخ قاسم يظهر زي مقالي مظهرش ابدا ..بس والحكاية هديت تاني لحد ما خالد اتقدملك .. ووافقت يجو هنا ويقابلونا ملحقتش اقولك لانك مكنتيش موجودة كنتي فالقاهره مسافره شغل.. حددت معاهم المعاد بليل تكوني انتي جيتي وفاتحتك فالموضوع وكنت عارفه انك مش هتكسفيني . وقفت فالمطبخ احضر حلويات للضيوف كنت ف عز الضهر ..لقيت فجاه الدنيا ضلمت ..وفي نور احمر جاي من مكان فالمطبخ ...الجو بقي برد جدا جدا جدا كان قلبي هيقف من البرد ..سمعت صوت فحيح جاي من ورايا اتلفتت..لقيته
الجن؟
اه يا بنتي هو ..ظهرلي وحذرني من انك تتجوزي خالد والا..
والا ايه يا ماما